BACOLOD CITY – Wala pa sa gihapon sang lead ang mga utoridad angut sa mga suspek nga nagtiro patay kay SPO4 Oscar Exaltado pasado las 7 sadtong Sabado sang aga, Enero 26 sa atubang sang isa ka eskwelahan sa Brgy. Singcang Airport, Bacolod City.
Suno kay Bacolod City Police Office, Public Information Officer Police C/Insp. Ariel Pico nga padayon pa sila nga nagatipon sang mga impormasyon kag statement sang mga witnesses agud matumod ang mga suspek nga nagtiro kay Exaltado.
Si Exaltado amo ang nagapungko bilang Deputy Chief of Police sang Police Station 6.
Base sa ila imbestigasyon, 20 ka basiyo sang armas nga 9mm kag calibre .45 ang nakuha sang utoridad sa crime scene kon diin 15 diri ang bala nag nag-igo sa lawas sang biktima nga amo naman ang gintunaan sang iya kamatayon.
Ginpahayag ni Pico nga may duha ka mga suspek nga nagpanaug halin sa isa ka salakyan kag nagsakay sa duha ka motorsiklo nga amo ang una nagtiro sa biktima sa likod.
Ginsiling sini nga sang natumba na si Exaltado, nagpalapit pa ang gunman, ginkuha ang armas sang biktima kag amo pa ang gin-gamit sa pagtiro sa ulo sang pulis sang makalima ka beses./dyHB BACOLOD
