Nakamugna og 11 ka turnovers si LeBron James sud sa usa ka duwa nga maoy labing daghan sa iyang karera. Apan wala kini igsapayan sa Cavs gumikan kay si James gihapon maoy nahimo nilang bayani.
Si ‘King James’ mirehistro sa ika-63 nga ‘triple-double’ sa iyang karera sa dihang gipilde sa Cavs ang Indiana Pacers, 118-108 sa NBA kagahapon didto sa Quicken Loans Arena sa Cleveland, Ohio.
Ang four-time MVP mipupo og 26 puntos, 11 ka assists ug 10 ka rebounds alang sa Cavs nga nakadaog kaupat sa katapusan nilang 11 ka duwa. Apil ang iyang turnovers, si James nakigduyog nilang James Harden ug Russell Westbrook isip mga players nga nakatali og quadruple-double sa NBA sud sa 15 ka tuig.
Didto sa Milwaukee, mipaulbo si Giannis Antetokounmpo og 41 puntos ug 13 ka rebounds aron agakon ang Bucks ngadto sa 116-91 nga kadaogan batok sa Brooklyn Nets.
Mao pa kadto ang pagbalik ni Giannis human nakapalta og duha ka duwa gumikan sa knee injury. Sukwahi sa Milwaukee, lahi ang nahitabo didto sa San Antonio gumikan kay ang Spurs napilde sa bisitang Philadelphia Sixers sa iskor nga 97-78.
Sa lain pang mga resulta, ang Charlotte Hornets mibihag sa Atlanta Hawks sa iskor nga 121-110, ang Utah Jazz nakaipsot sa Toronto Raptors, 97-93, ang L.A. Lakers miihaw sa Chicago Bulls sa iskor nga 108-103.
(Photo from Web)
