Patay ang usa ka gituohang squad leader sa New People’s Army kon NPA sa nahitabong engkwentro tali sa tropa sa 88 Infantry Battalion, Philippine Army sa bukid nga bahin sa Barangay Mandahican, Cabanglasan Bukidnon niadtong Sabado sa buntag.
Sa interview sa RMN Malaybalay ngadto kang Major Rodulfo Cordero Jr., ang hepe sa Division Public Affaris Office sa 4th Infantry Division, Philippine Army gibutyag niini nga nahitabo ang engkwentro human nga nakadawat ug sumbong ang tropa sa kasundaluhan gikan sa mga concern citizen nga adunay presensya sa armadong grupo sa mao nga dapit.
Muabot sa 10 ka minutos ang nahitabong engkwentro tali sa militar batok sa muabot sa 15 ka mga miyembro sa NPA.
Matud ni Major Cordero nga human ang panag-sangka narekober sa kasundaluhan ang patay nga lawas sa gi-ingong squad leader nga si alyas “Daligas”, sa Guerrilla Front Malayag. Wala pa nila na-ila ang kompletong pangalan niini.
Sigun niya nga ang mao nga grupo ang gitudlong responsible sa pagsunog sa heavy equipment sa usa ka quarry site sa Barangay Sinabuagan, siyudad sa Valenciaq niadtong Hunyo 19 ning tuiga.
Gawas sa patay nga lawas, narekober usab sa kasundaluhan sa encounter site ang 1 ka M16 rifle ug upat ka mga magazines, 8 ka mga cellphones, mga tambal ug mga personal nga mga gamit.
Nadiskubre usab nila duol sa clash site ang hideout sa mga NPA nga mamahimong maka-accommodate sa 30 ka mga tawo.
Gikonsidera usab niya nga usa kini ka dakong kalampusan sa tropa panggagamhanan.
