Dili supak si Starex Piston Region 10 Secretary General Ringo Lago sa programang modernisasyon sa mga pampublikong sakyanan nga gipatuman sa gobyerno.
Kini gumikan kay gitan-aw usab nila ang seguridad ug kaayohan sa katawhang sumasakay, batok sa mga karaang pampublikong sakyanan nga kinse ka tuig nang nagdagan sa kadalanan.
Apan dili matud pa makatarunganon ug patas ang gipakanaog nga kamandoan sa gobyerno tungod kay ang makapahimulos lamang mao lamang kadtong mga langyawng negosyante.
Gibutyag ni Lago, nga usa lamang kini ka paagi sa paglipat-lipat nga gihimo sa gobyerno tungod kay dili kini maghatag kaayohan ngadto sa mga gagmayng operator, driver ug mga pasahero.
Mahinumdoman, nga unod sa maong guidelines nga ilisan sa mga bag-ong P-U-J ang mga sakyanan sa kadalanan nga kinse ka tuig nang nagdagan.
Dugang pa ni Lago, nga tumong matud pa niining mahalin ang sakyanan sa mga negosyanteng langyaw nga planong ibaligya ngadto sa mga operator sa sakyanan.
By: RadyoMaN Ellah Baculio
