Daghan ang nakadayig sa gipatuman nga mga palisiya sa STARTED kon Sarangani Transport Alliance for Reform and True Development isip pagsuporta sa gobyerno nga mabatukan ang Coronavirus.
Ang mga pasahero na mismo ang nakadayig sa gipatuman nga physical distancing ug sa pagkarga sa singkwenta porsyento (50%) lang sa passenger’s capacity sa mga pampublikong sakyanan sa Sarangani, hilabi na ang mga multicab sa Alabel, aron dili magdasok sa sakyanan.
Bisan ang mga van ga-byahe sa MaKiMa area/Maasim-Kiamba-Maitum ang naga-obserba usab sa maong palisiya ug naga-disinfect pa sila sa ilang mga unit. Nagpadangat na lamang og pagpasalamat si Governor Steve Chiongbian Solon ngadto sa STARTED tungod sa gipakitang kooperasyon.
Tuig 2008, gi-organisa mismo ni Governor Solon, bise gobernador pa sya kaniadto, ang STARTED, ang nag-inusara hangtud karon nga provincial transport federation sa tibuok Sarangani Province. Wala pa nagpatuman og total lockdown ang Gensan maong nagpadayon ang public transportation. Bisan ang Sarangani ang wala nag-total lockdown aron makalihok pa ang mga tao sa mga importanteng lihukunon ug makapalit sa mga angay paliton.
Gi-limitahan lang pag maayo ang paggawas sa tao matag balay kadtong importanteng lakaw lamang, dili magtapok-tapok, gikinahanglan nga naka-face mask samtang naa sa gawas, ug naka-physical distancing. Una ng nagmando si Governor Solon nga sundon sa mga taga-Sarangani Province ang pagpatuman sa “6 feet away-2 meters apart” nga palisiya sa physical distancing isip panagana nga dili matakbuyan sa COVID-19. Mubo ra matud pa ang usa (1) ka metrong gilay-on nga unang gikaingon sa social distancing kung anaa sa publiko, maong naghatag og direktiba ang Gobernador ngadto sa mga mayor nga duha (2) ka metros dapat ang distansya kung adunay kaisturya o katapad.
Mao na usab kini ang gipatuman matud pa nga patakaran didto sa mga nasud sa Europa.
