BACOLOD CITY – Isolated case gid lamang. Ini ang ginklaro sang concert organizer nga si Joe Louie Baylon angut sa diutayan na lang nga pagkadula sang smartphone sang singer sang Stephen Speaks durante sang iya pag-perform diri sa Bacolod City sadtong nagligad nga Sabado sang gab-i.
Base sa CCTV footage sang resto-bar kon diin didto nag-perform ang singer, makita nga may isa ka audioman nga naka t-shirt sang itom nga amo ang naka-kita sang cellphone ni Rockwell Ryan Ripperger, ang American singer kag songwriter sang pop band nga Stephen Speaks.
Ang pop band nga Stephen Speaks amo ang nagpabantog sang kanta nga Passenger Seat kag Out of My League.
Nahibaluan nga nabilin gali sang singer ang iya cellphone sa lamesa kon diin wala na niya ini natalupangdan bangud nangin masaku na siya sa pag-sign sang mga autographs kag ang amo nga audioman ang naka-kita sini.
Apang imbes nga i-uli ukon mag report sa utoridad, nakita sa CCTV nga gintabunan sang amo nga lalaki sang isa ka bag ang cellphone kag nag-gwa sa amo nga resto-bar bitbit ang smartphone sang singer.
Sang nahibaluan na sang singer nga missing ang iya cellphone, gilayon ini nga nagreport sa tag-iya sang bar nga madasig naman nga nag review sang CCTV kag didto nakita ang suspek.
Suno kay Ripperger nga nagakabalaka gid lamang siya sa pagkadula sang iya cellphone bangud madamo siya sang mga importante nga notes didto lakip na ang iya mga latest nga composition, isa diri ang iya gin-compose para kuntani sa mga nasamaran nga soldado sang inaway sa Marawi City.
Nakilala ang amu nga audioman kag nagpangayo ini sang patawad sa singer kon diin iya ginsiling nga “indi niya hungod” nga kuhaon ang telepono kag nalipat lang siya nga magreport sa utoridad kag ibalik ang cellphone.
Apisar sang natabo, ginpahayag sang concert organizer nga nag-enjoy si Ripperger sa iya pagkadto sa Bacolod kag may plano pa nga magbalik. /Stephen Speaks on Twitter photo
