Madasig nga napahamtang sa safe nga lugar kag hilway ang tanan nga mga estudyante matapos nagluntad ang isa na naman ka sunog pasado las 8 sini gid lamang nga aga sa isa ka room sa third floor sang elementary building sang STI-WNU, Bacolod City.
Ini apisar nga may pila ka mga estudyante ang nalipong bangod man sa kahadlok kag kakulba.
Suno sa impormasyon nga nakuha sang DYHB sa Vice President sang STI-WNU nga si Mr. Ryan Mark Molina, ang sunog nagluntad sa isa ka hulot sa 3rd floor sang Basic Education Building.
Samtang, ginpahayag naman ni Bacolod Bureau of Fire Protection Chief, Fire Marshall Publio Plotenia nga napalong ang kalayo (fire out) may mga las 8:50 sini man nga aga.
Sa karon ginahulat ang resulta sang imbestigasyon kon bala ano ang gintunaan sang amo nga sunog.
Nahibaluan nga ini na ang ikatatlo nga sunog nga nagluntad sa ciudad sang Bacolod sa sulod sang isa gid lamang nga semana kon diin saddtong Martes, November 26 nasunog ang Java Pension House nga nagtuga sang kamatayon sang 6 ka tawo.
Samtang kahapon, November 28 nasunog man ang isa ka balay sa Brgy. 2 kon diin napatay man ang isa ka 5-anyos nga bata.
