Ginkawatan ang isa ka STL booth sa Sitio Bagong Tuklas, Brgy. Liwanay, Banga, South Cotabato, alas 3:50 sang hapon, kahapon nga adlaw, Oktubre 25, 2021.
Suno kay P/CAPT. Joseph Villanueva, Chief of Police sang Banga MPS, samtang yara sa sulod sang STL booth ang biktima nga si Gracel Vicentino Perez sang duha ka wala makilal-an nga mga suspek sakay sa motorsiklo ang nagpakuno-kuno nga magtaya kag pwersa nga ginguba ang pirtahan sang booth kag gintayaan sang kutsilyo ang biktima kag pwersa nga ginkuha sa iya drawer ang P4, 565.00.
Gilayon naman nga nagpalagyo ang mga suspek sakay sa motorsiklo.
Apang sa ginpatigayon nga hot pursuit operation sang Banga MPS, naaresto ang isa sa suspek nga ginkilala kay Ricsan Artizona Ibañez @ tata, 37-anyos kag residente sang Prk. Malinong, Brgy. Benitez, Banga nga gintudlo mismo sang biktima.
Samtang ang isa pa ka suspek ang nagapabilin nga at-large.
Sa subong ang naaresto nga suspek ang yara sa kustodiya sang Banga Police Station kag natalana nga pasakaan sang nagakaigo nga kaso.
