General Santos City—Ugdaw ang usa ka stock room ingon man ang usa ka unit nga E-jeep sa sunod sunod nga sunog nga natigayon sa managlahing lugar dinhi sa Gensan kagahapong adlawa.
Unang nasunog ang stock room alas 12:15 ang takna sa udto sa may Block 2, Sugod, Apopong, Gensan kansa gipanag-iyahan sa usa ka Analiza Inriquez.
Sa inisyal nga imbistigasyon sa BFP-Gensan ngadto sa lugar nasuta nga unang miulbo matud pa ang kalayo sa tunga nga bahin sa estruktora.
Paspas nga nakarespondi ang BFP-Gensan apan tungod dako na ang kalayo sa ilang pag-abot naugdaw gyud ang maong stock room. Unod sa maong stock room ang mga motor parts ug uban pang mga gamit.
Samtang ala 1:00 pasado sa hapon dihang nakadawat sab ug report ang BFP-Gensan human adunay E-jeep matud pa ang nasunog nga gipanag-iyahan sa Metro Gensan Transport Cooperative ug gimanihuan sa usa ka Cesario Burlas.
Sa impormasyon nga nakalap sa BFP-Gensan, gicharge matud pa ni Burlas ang maong E-jeep sa panimalaty sa usa ka residenti sa may Phase-3, Barangay mabuhay apan human sa kapin usa ka oras kalit lang matud pa nga nagpiti-piti ang charger niini nga gisundan sa gamayng buto.
Didto na miulbo ang kalayo ug tungod gama sa fiber ang E-jeep paspas lang kining gilamoy sa kalayo. Gisuwayan pa ug bubo ug tubig sa mga residenti ang maong E-jeep pero wala gyud kini matabang.
Sa imbistigasyon sa BFP Gensan posibleng nag over heat ang battery sa maong e-jeep nga hinungdan sa sunog.
