Storm Signal No. 1 taglibkas na sa Surigao City
Taglibkas na an Storm Signal No. 1 sa bagyong Vinta sa Surigao City. Ini an tagpadayag sa pinakalatest na weather bulletin nan PAG-ASA Surigao pinaagi kan Engr. Frances Semorlan.
Sa tigom na taghimo ganina sa mga naglangkob sa City Disaster Risk Reduction Management Council sa Post Assessment , tagtudlo ni Engr. Semorlan na base sa ila pag-monitor an direksiyon sa bagyo pasingod na sa Marawi, posible isab na pag-abot sa Lunes an mogawas na ini sa Phil. Area of Responsibility o PAR. Hinoon may laing mosuyoray na bagyo na tagtakda pagatawgon na Wilma.
Sa report nan lain-laing ahensiya, namahayag an CDRRMO Engr. Elmer Tecson na base sa ila paglibot-libot, may isa ka insidente sa landslide an mitumaw sa Brgy. Mapawa. Lakip na natuki an plano sunod 2018 an pagpalit nan mga portable toilets para magamit nan mga nobakwit na pamilya. Nasinati kuman nan mga namakwit na nagka-problema sa kawad-on nan CR na magamit.
Sa habig isab nan Phil. Ports Authority tagtudlo na padajon na may stranded na pasahero na moabot sa 553 kabuok tanan lakip an 152 na rolling cargoes. Sa habig sa City Social Welfare and Dev’t. Office tagpadayag na nagpaabot sila nan dugang supplay sa pagkaon sa Brgy. Lipata, San Juan ug iban pa na barangay na may mga namakwit na pamilya, hinoon kasagaran an nouli na isab dajon ganina buntag sa ila tagsa-tagsa ka panimayay.
