SYUDAD sang Iloilo – Isa si Iloilo City Councilor Ely Estante sa mga nabiktima sang dengue sa syudad.
Sa interview sang RMN Iloilo kay Councilor Ely Estante, iya ginsaysay ang mga inagihan sa pagpakigbato kontra dengue hemorrhagic fever.
Suno kay Estante, first time niya nga madengue. Antes ma confine sa ospital, nakabatyag siya sang hilanat kag gina-chill ukon nalamigan ilabi na kon gab-i.
Sa aga naman, naga-ayo ang iya pamatyag.
Nagtrabaho pa si Estante sa Iloilo City Hall tubtob ini ang naglisensya nga magpa-uli bangod nagalain ang iya pamatyag.
Sa iya pagpauli, sang nag-ilis na sang iya bayo, nakita ang nagapula-pula sa iya lawas— rashes.
Dugang pa diri nga malain ang iya pamatyag kag daw nagasungaw ang init sa iya mata.
Nagdesisyon ang konsehal nga magpacheck-up sa doktor. Sa amo nga tion, nagahuna-huna naman ang konsehal nga posible dengue ang iya ginasuprer.
Pag-aku ni Estante, nagkuha pa siya sang ugbos sang kapayas kag gin-inom ang duga.
Sang ara na sa ospital, nakumpirmar nga na dengue ini paagi sa laboratory test.
Indi na normal ang platelet count sang konsehal kag naglab-ot pa sa punto nga nagnubo ini sa 52.
Nagdupla man ini sang dugo apang gintago niya sa doctor bangod nahadlok siya nga ma ICU.
Nakabulig man suno kay Estante ang pag-inom sang madamo nga tubig bangod ang iban nga pasyente nagakapatay bangod sa dehydration.
Maswerte lang suno kay Estante nga pala-inom siya sang tubig. Mabudlay suno sa iya ang mga pasyente nga bata nga mabudlay paimnon sang tubig kag kinahanglan pa nga piliton.
Mabudlay man kon maospital bangod indi ka makapahuway sang husto. Dugang pa diri ang hassle sa oras sang pamilya kag ang bill sa ospital.
Sa karun balik na si Councilor Ely Estante sa pagtrabaho sa konseho matapos malampuwasan ang pagtilaw sang dengue.
Panugyan sini sa publiko, ipabilin nga malimpyo ang palibot agud malikawan ang lamok nga nagadala sang balatian nga dengue.
