Nagpatabang sa kapulisan ang usa ka Driver sa prime mover human natripan sa miyembro sa Children in Conflict With The Law (CICL) o mas nailhan sa tawag nga “BATANG SUKARAP” samtang kini nagmaniho sa iyang sakyanan sa may Prk. Puting Bato Brgy. Calumpang ning syudad.
Sumala pa ni Ben Nuevo Driver ug lumulupyu sa Tantangan South Cotabato nga als 3.00 ang takna sa kadlawon niadtong Domingo, July 23, 2017 samtang nagmaniho sa iyang sakyanan ang nahisgutan siya nakadungog ug tulo ka sunod sunod nga buto.
Sa pagtuong ligid sa iyang gimanihuang sakyanan ang mibuto, siya mihunong daplin sa kalsada ug minaog aron tan-awon ang iyang ligid.
Samtang anaa sa ubos sa iyang sakyanan, iyang nakit-an ang grupo sa mga batan-on nga namunit matud pa ug bato. Tungod niini siya dali dali nga mibalik sa sakyanan dayon gipakaritil ug dagan padulong sa Police Station 5.
Pag abot sa police station didto na niini nasuta nga dili bato ang nakaigo sa salamin sa iyang sakyanan kon dili bala sa sumpak.Nasayran nga tulo gyud ka buslot ang naangkon sa salamin sa sakyanan.
Gilayon usab nga girespondihan sa kapulisan ang lugar nga miresulta sa pagkasikop sa 18 anyos nga miyembro sa Sukarap nga si Jerald Jay Estriba, lumulupyu sa brgy Fatima, kansa directing gitudlo sa reklamante nga usa sa mga mibato ug mipusil sa iyang sakyanan.
Giangkon usab sa suspek nga ilang natripan ang maong truck, sumala pa nga nagsabot ang iyang mga ka grupo nga mangatang ug sakyanan aron nga ilang tripan, ug ang sakyanan nga gimanihuan sa reklamante maoy unang miagi sa lugar mao nga ila kining gibato.
Hugtanon usab nga gihimakak niini nga ilang gipusil ang salamin sa sakyanan gamit ang sumpak. Sumala panga bato ray ilang gigamit sa paglabay niini.
Nangayo hinuon ug pasaylo ang suspek ngadto sa ilang naagrabyadong driver. Misaad usab ang nahisgutan nga dili na niya usbon ang maong gimbuhaton. Sa kasamtangan ang suspek nagpabiling balhog sa silda sa Police Station 5.
