Suldado nga nagduaw sa haya sang iya lola gintiro, patay

Dead on the spot ang katapo sang Philippine Army makaligad nga luthangon sang wala nakilal-an nga suspek alas dyes sang nagligad nga gab-i sa Tribaco Residence, Purok 5, Barangay San Vicente, Banga, South Cotabato.
Ginkilala ang biktima kay PFC Joel Tribaco Pabon, 43anyos, may asawa, katapo sang Philippine Army nga nadestino sa 65th IB, 9th ID sa syudad sang Marawi kag residente sang Purok Ilang-Ilang, New Isabela, Tacurong City.
Naguwa sa imbestigasyon sang Banga MPS, bag-o pa nagluntad ang insidente, samtang nagainom suno pa ang biktima sang makahulubog nga ilimnon sa nasambit nga lugar, kaupod si Ronnie Guillema, 61anyos, mangunguma, residente sang nasambit nga Barangay sa haya sang iya sini lola.
Hinali na lang suno pa nga naglusot ang suspek kag tigayon nga ginluthang ang biktima sa nawong gamit ang shotgun kag madasig nga nagpalagyo sa wala nahibaluan nga padulungan.
Bangud sa insidente, gilayon suno pa nga ginbawian sang kabuhi ang biktima.
Samtang narekober naman sa gintabuan sang krimen ang calibre 45 Norinco 1911 A1 nga kargado sang pito ka bala sa hawak sang biktima kag duha ka pellets sang shotgun .
Gilayon naman nga ginpaidalom sa kustodiya sang South Cotabato Provincial Crime Laboratory ang nakuha nga mga ebidensya.
Kaangot sini ginpahayag ni Police Chief Ins Virlen Pampolina, Hepe sang Banga MPS, blangko pa sila tubtub karon sa motibo sang nagluntad nga insidente.
Dugang pa nya, may ginatutukan na sila kun sin-o ang suspek nga nagluthang sa biktima apang nagatipon pa sila sang ebidesnya para mapasakaon ini sang kaso sa korte.
Dugang pa ni Pampolina, isa sa ginatan-aw nila nga anggulo sa pagpangluthang sa biktima, ang nagluntad nga kinagamo sa haya sang iya sini lola matapos nga yara suno pa sila sang makahulubog nga ilimnon.
Samtang ginalauman naman nya nga masolbar ang nasambit nga kaso sa sulod sang duha ka semana, depende suno pa sa mga testigo.