Sarangani Province—Dako ang pagdayig sa IP community sa probinsya sa Sarangani ngadto sa Sulong Tribu program ni Governor Steve Chiongbian Solon tungod sa mga kalambuan nga ilang natagam-taman baynte-uno (21) katuig na ang nakalabay human nahimong balaod atong October 29, 1997 ang Republic Act No. 8371 kon IPRA Law, Indigenous Peoples’ Rights Act.
Sa nahitabo bag-uhay lang nga Provincial Indigenous People Thanksgiving Day, gituyo sa mga organizer gipangunahan ni Board Member Fredo Basino, ang IPMR o indigenous people mandatory representative sa Sangguniang Panlalawigan, nga dili ra kini pagatawagon nga IP Day kundili usa ka dakong thanksgiving isip pagpasalamat tungod sa nagpadayon nga lig-on nga panaghiusa sa nagkadaiyang tribu sa Sarangani duyog ang mga grasya og bendisyon sa Kahitas-an. Adunay tulo (3) ka mga dagkong tribu sa Sarangani gilangkuban sa Blaan, Tboli og Tagakaulo.
Bisan ang bisita sa maong panagtigum taga-Isabela Province, Northern Luzon nga si Congressman Jose Panganiban, ang congressman sa partylist nga ANAC-IP kon Ang National Coalition of Indigenous Peoples Action Na, Inc., ang namahayag nga wala pa man matud pa natawo ang IPRA Law sa Pilipinas apan sa Sarangani dugay rang giila sa lokal nga gobyerno ang mga kaigsoonang lumad, nagsugod tuig 1995 pa sa dihang gi-organisa sa apuhan sa gobernador nga si Gobernadora “Mommy Priscy” Chiongbian ang PTC kon Provincial Tribal Council. Baynte-tres (23) ka tuig nang gabarog ang Provincial Tribal Council sa entiro Sarangani Province.
