Davao City – Kun ang atong 42,000 kapin ka mga kabarangayan sa entero nasud-Pilipinas maglunang sa droga gumikan kay mismong ang mga kadagkuan niini nagdula man sa maong kabuang, kaluoy intawon sa mamahimong ngitngit ug dulom nga kaugmaon sa atong mga kabataan ug sunod nga mga kaliwatan.
Unsa na lang kaha ang mamahimong kinabuhi sa atong sunod nga henerasyon sa kabatan-onan kun ang droga tugtan na nga magkatap kun mokuyanap daw gipamaligyang piniritong saging sa kadaplinan o kadalanan kun kining gitawag nga mga drug dens kun mga eskinita?
Dili nato kini tugtan nga senaryo nga mahitabo. Kun gikinahanglan nga atong pakamatyan kini nga damgo, buhaton nato haron kalikayan nga ang sunod natong mga kaliwatan mamahimong daw mga zombie kun ‘walking dead’ – buhi pa apan kansang kalag gitustar na’g maayo didto sa nagdilaab nga kalayo sa impyerno!
Karong Mayo 14, sugdan nato ang paghinlo ug paglimyesa sa atong katilingban pinaagi sa paghingilin niadtong mga adik nga mga opisyales sa barangay ug ihatud sila ngadto sa karsel haron dili na makahimo pa sa mas grabe pang kadaut sa kinabuhi sa tagsatagsa nila ka mga katawhan kun constituents.
Kini na maoy hustong panahon nga mo-resbak kitang tawo kontra sa mga salawayong kadagkuan sa matag barangay kinsa inay mamahimong role models, sila na man hinoon ang tigpasiugda sa dinautang bisyo.
Himoon nato kining taliabot nga piniliay nga unique opportunity kun talagsaong kahigayonan nga hukasan sa maskara ang tanang drug personalities sa barangay halls aron hiniusa natong isangun ang yogo sa pangatungdan ngadto sa mga abaga niadtong bag-ong matarong nga lideres sa atong kabarangayan: Kadto lamang may igong kaligdong ug katakos, kadtong matarong ug dili tigpayuhot sa perdisyon ug kamatayon sa linghud natong mga kabatan-onan!
RadyoMaN June Duterte
