Davao City – Taas ang atong tan-aw nga mga lungsuranon ngadto sa atong mga awtoridad ilabi na sa mga uniformed enforcers. Ang katilingban gitudloan nga motuman sa mga lagda sa balaud nga gipasunod sa mga men in uniform ug mga personahe sa atong civil service kun bureaucracy.
Apan kining pagtahud naguba gumikan sa sunod-sunod nga akusasyong kalambigitan sa mga taga-gobyerno nganha sa mga dautang buhat sama sa anomaliya, pagpasulabi sa gahum kun poder, pagpangawkaw sa kaban sa nasud, involvement sa mga iskandalo, kawat ug korapsyon, drogas, pagpanglupig sa mga way igong katakos depensahan ang ilang kaugalingon ug uban pang matang sa krimen.
Unsay angay buhaton haron mahibalik ang maong kumpyansa sa tawo ngadto sa mga nangalagad sa gobyerno pananglitan sa mga ginsakpan sa kapulisan ug kasundaluhan?
Usa ka urgent challenge mao nga tarungon nila ang pagpatuman sa ilang tagsa-tagsa ka mga trabaho, sundon lamang ang gilatid sa balaud sama sa PNP Operational Guidelines, ‘rules of engagement,’ ‘respect for human rights’ ug ang pagtratar sa katawhan sa maki-angayong pamaagi.
Pahinumdom lamang nato ngadto sa atong mabuot nga mga awtoridad nga respetohon ang pagsalig sa mga lungsuranon ug dili gayud talikdan ang sagradong mandatong gisangun nato ngadto kanila. Unta dili sila mahimulag sa kamatuoran nga ang badge kun tsapa ug ang service firearm ‘symbol of authority’ ug dili ‘tool for oppression’ kontra sa tawo.
RadyoMaN June Duterte
