Davao City – Matag balota ug matag boto karong May 14 bililhon kaayo. Matag higayon nga isulat nato ang usaka pangalan diha sa talaan sa kandidatong buot natong himoong atong representante, nagpasabot kana nga atong gihatag ngadto kanila ang atong sagradong pagsalig nga sila magmatinud-anon sa pagpangalagad sa tawo.
Sa higayon nga kita ilang luiban ug ilaron pinaagi sa pagdaut sa imahe ug pagsalig nga atong gitugyan ngadto kanila, sama ra gihapon nga kita ilang gibudhian.
Akong gidasonan kining ideya nga atong ipahibalo ngadto sa publiko kining drug watchlist kun narco list nga gikuptan karon ni Pres. Rodrigo Duterte.
Mas maayong atong masayran kinsay anaa diha sa kritikal kaayong talaan haron magmalinawon ‘tang tanan kay hangtud dili masapubliko ang maong listahan, kutob sa kapitan sa barangay akusado, gikabaniog rightly or wrongly ug gikasuspetsahan karon nga nagdula sa illegal drugs.
So, haron masayran nato ang hingpit nga kamatuoran, tapuson ‘ta ni pinaagi sa pag-abli nianang maong drug list ug bahala na’g kinsay maligsan or maig-an!
Sa maong pagkaagi, magtunol kini ug hustong higayon sa mga kapitan nga anaa sa maong talaan nga ipaklaro ang ilang bansagon ug pagkatawo, pamatud-an nga dili tinood nga sila naggamit, namaligya o bin ba kaha protektor sa drugs sa ilang lokalidad ug komunidad.
Ug sa dihang napahibalo na nato sa tawo ang unod sa maong drug kun narco list, dili ‘ta mohunong dinhang dapita: Angayang mosunod ang pagpasaka sa ensaktong kaso o reklamo batok sa usaka opisyal sa barangay haron dili matinood ang alegasyon sa uban nga mugna-mugna lang sa ilang mga kalaban or pamulitika lamang kining tanan.
Kun husto ang unod sa listahan, malauman nato nga kadtong ginombrahan diha, didto gayud mosangko sa bilanggoan. Apan kun haguka ang akusasyon, panahon kini haron kadtong opisyal nga nadalahig mahatagan sa parehas o patas nga oportunidad nga hinloan ang ilang pangalan bisan na ang bansagon sa entero pamilya nga sagad gayud maapil panahon sa pagkadaut sa pagkatawo sa usaka miyembro sa banay.
RadyoMaN June Duterte
