Davao City- Ning panahon sa Pasko ingon man sa nagsingabot natong Bag-ong Tuig 2018, aduna koy tulo ka mga yanong pangaliya sa Kahitas-an:
Una: Akong gipangandoy nga unta taliwala sa daghanan natong tagsa-tagsa ka mga personal o indibidwal nga mga hagit, suliran o mga struggles sa kinabuhi, dili gayud unta nato hikalimtan nga wala kita mag-inusara sanglit anaa ang Diyos sa Kalangitan nga maoy Magbubuhat nato ug ako nagtoo nga dili ug dili gayud kita Niya pasagdan – basta kay salig lamang kita Kaniya sa tim-os ug bug-os nga matang sa pagsalig.
Ikaduha: Akong gipangaliya gikan sa kinailadman sa akong kasingkasing nga taliwala sa kagubot, panagbangi, kaligutgot, gubat ug kawalay pagsinabtanay, unta mas mopasulabi dili ang atong panagkalahi-lahi sa tinohoan o relihiyon, ideolohiya or political belief, doctrines and persuasion kon dili ang atong panaghiusa, pagsabot sa ugat-hinungdan sa bangi ug ang paghatag ug bili sa kasagrado sa kinabuhi, panaghigalaay ug sa atong pamilya ug katilingban.
Ug ikatulo, akong gipangandoy nga unta ang ganghaan sa kalangitan padayong bukas ug abli sa Iyang walay kinutuban ug katapusang gugma, grasya ug pagpasaylo alang kanatong iyang mga binuhat ilabi na sa mga panahon diin kita magkasala ug mahimulag gikan sa iyang kahimayaan.
Ipanalangin nato ngadto sa Kalangitan nga ning espesyal nga panahon, atong ma-sentro ang usaka butang: Nga kini adlaw’ng natawhan sa Diyos nga nagpakatawo gumikan sa iyang hilabihang gugma sa katawhan.
Usaka malipayon, masanagon ug bililhong kasaulogan sa kapaskuhan ingon man sa pagsaulog sa entrada sa bag-o na usab nga tuig sa mga oportunidad ug bendisyon!
RadyoMaN June Duterte
