Davao City – Kun adunay sektor sa mga nangalagad sa katawhan ang anaa gayud sa frontlines kana way lain kon dili ang atong mabuot nga mga miyembro sa nasudnong kapulisan kun mga men in uniform.
Sa mga pulis nga super snappy kaayo, nagtinarong sa pagpanerbisyo, niadtong gihagoan, girespetar ug gi-ampingan ug maayo ang ilang badge kun tsapa ug service firearm silbing symbol of authority, hurot ang akong bilib ninyo, sama niadtong magpulaw aron lamang ang katawhan hinanok nga mahikatulog sa kagabhi-on ug haron ang entero syudad mamahimong magmalinawon.
Apan niadtong gi-abusaran ang pagsalig nga gitahan sa tawo ngadto kanila, niadtong mga pulis nga inay mamahimong role models, sila na man hinoon ang mo-unay sa katawhan pinaagi sa kalambigitan sa droga ug uban pang iligal nga binuhatan, pandamay mong dagku!
Ako nagtoo nga mayoriya kun mas daghan sa gihapon sa kapin cien mil ka pwersang Philippine National Police mga personaheng nagtinarong sa ilang tahas ug panaad nga ‘To Serve and To Protect,’ mga bayaning andam itahan ang kaugalingon aron lamang ang gi-alagarang katilingban makabaton sa hilway nga komunidad.
Sanggi-on nato ang mga tampalasang miyembro sa kapulisan, taktakon nato sa pwesto kadtong gihimo lamang taming ug pangwarta ang poder aron mamentaha sa yanong tawo, aron sa ingon ang but-an nga mga pulis dili matakdan sa mga bugok ug daut diha sa ilang hut-ong.
Kini maoy angay buhaton sa liderato sa PNP – kun buot niini nga mahibalik ang hingpit nga pagsalig sa sosyedad ngadto sa ilang nasudnong kapulisan.
RadyoMaN June Duterte
