Davao ity – Sikop ang usa ka sundalo atol sa gikasang buy-bust operation sa Philippine Drug Enforcement Agency Regional Office XI uban ang Bunawan Police Station, 15th AIB Air PA, 71st Infantry Batallion, Compostela Valley Provincial Intelligence Branch ug Maco Municipal Police Station kagahapong adlawa alas-6:00 sa buntag sa may Barangay Limbo, Maco, Compostela Valley Province.
Giila ang suspek nga si Corporal Arman Oria Octaviano, 35-anyos, minyo ug residente sa Barangay Bagong Flores, Lupao, Nueva Ecija kinsa sakop sa 71st Infantry Batallion, 7th Infantry Division, Philippine Army.
Sumala sa PDEA-XI nga napalitan ang suspek sa ilang asset og 5 gramos nga shabu nga nagkantidad og P50,000.
Nakuha usab sa posisyon sa dinakpan ang laing 20 gramos sa gituohang shabu nga adunay estimated street value nga P300,000 ug mga drug paraphernalia, buy-bust money ug boodle money atol sa operasyon.
Matud sa PDEA-XI nga usa ka concerned citizen ang nisumbong kanila pinaagi sa PDEA hotline nga nalambigit ang maong sundalo sa iligal nga droga.
Busa nikasa’g surveillance ang mga operatiba sa maong suspetsado.
Gibaharan ni PDEA-XI Regional Director Antonio Rivera nga walay santuhon ang balaod ilabi na sa mga opisyales sa gobyerno nga nalambigit sa iligal nga droga.
“No matter who you are or whatever your background is, as long as you violated the law, this agency would implement the full strength of the law against you,” sumala ni Rivera.
Gipriso karon sa PDEA-XI detention facility ang suspek ug mag atubang kini og kasong may kalapasan sa Section 5, Section 11 ug Section 12, Article II sa Republic Act 9165 kun Comprehensive Dangerous Drugs Act of 2002.
Samtang ang mga nakuhang droga isumite ngadto sa PDEA Laboratory Service para sa eksaminasyon.
Gi-awhag sa ahensya ang publiko nga i-tawag o i-text kanila ang mga nalambigit sa mga drug activities sa numerong 082-222-3045, 09395433405, 09331481387 o 09326371353.
RadyoMaN Aimee Guinita
