By: Nitz Arancon
Samaran sa wala nga bahin sa iyang ulo ang usa ka Corporal sa Philippine Army, sa dihang napingsan kini sa bala gikan sa ilang mga kaaway, atol sa ilang panag-encounter didto sa Barangay Iba, lungsod sa Cabanglasan Bukidnon, bandang 6:30 pm. niadtong domingo.
Ma-o kini ang report nga nahipos ni Police Regional Office 10 Spokesman, Police Supt. Lemuel Gonda.
Gipa-ila ni Supt. Gonda ang samaran nga sundalo, nga mao si Osilito Tubos, nga sakop sa Sila-e Detachment sa Philippine Army didto sa Cabanglasan, Bukidnon.
Matud ni Supt. Gonda, nga ang first Squad sa Sila-e Detachment, naglunsad sa ilang security patrol didto sa Barangay Iba, apan ilang nasugat ang wala ma-ihap nga gidaghanon sa mga rebildeng NPA, ug didto nahitabo ang ilang panagsangka.
Mokabat sa kapin kon kulang 10 ka minute ang sinokli-ay sa bala tali sa mga rebilde ug mga sundalo, ug napingsan sa ulo si Corporal Tubos, apan suwerti kay nakalikay kini sa iyang kamatayon.
Matud ni Supt. Gonda, nga tungod niini, ang kapolisan sa lungsod sa Cabanglasan, naglunsad dayon sa ilang blocking operation, pina-agi sa ilang pagmontar sa mga check point, ug ilang gisusi ang tanang sakyanan, nga mo-agi padulong sa Pulangi river aron pagsuta, kon na-a bay presensiya sa mga rebilde, nga nagmugna sa mga kasamok sa lalawigan sa Bukidnon.
