PFC TAJONERA GIPAUBOS SA STRESS DEBRIEFING HUMAN GIBUHIAN NA SA MGA NPA
Gibuhian na sa rebelding New Peoples’ Army (NPA) ang gibihag nga sundalo nga si PFC Raymond Tajonera nga sakop sa 26th IB Phil. Army didto sa bukirang bahin nga sakop sa Bayugan city, Agusan del Sur diin mismo si Mayor Kirk Asis maoy midawat sa sundalong gibuhian.
Si PFC Tajonera ang gidagit sa mga NPA didto sa San Miguel, Surigao del Sur.
Kini ang gikompirma ni Maj. Rodolfo Cordero, ang Civil Military Operations (CMO) Officer sa 4th ID Phil. Army sa interview sa RMN DXBC Butuan.
Sa karon nakabalik na sa battalion si PFC Tajonera apan wala pa kini gitugutan nga mobalik sa duty sanglit gipaubos pa sa stress debriefing aron masiguro nga anaa kini sa maayong kahimtang human gigunitan sa rebelding grupo sulod sa pipila ka mga semana.
Padayong gibarugan ni Maj. Cordero nga nag-AWOL kon Absence Without Official Leave si PFC Tajonera maong nahidangat kini didto sa Surigao del Sur bisan ug gawas na sa ilang area of operation.
Apan agig tubag sa alegasyon nga wala nag-AWOL si PFC Tajonera kondili gisugo kini sa usa ka 1Lt. Peniaz sa Delta Company sa 26th IB Phil. Army aron magsilbing security guard sa tunnel ni Jasmine Acevedo, nagmugna ug Board of Inquiry (BOI) si BGen. Maurito Licudine, Brigade Commander sa 402nd Brigade Phil. Army aron kini ma-imbistigahan.
