Gisikop sa kapulisan ang usa ka sundalo human gipusil ang usa ka traffic enforcer sa JR Borja Bridge ning syudad sa Cagayan de Oro sa dihang naipit sa traffic.
Ang suspek mao si Private Guilmo Lofranco, Jr., aktibong sakop sa 51st Infantry Battalion sa Pagadian, Zamboanga del Sur, naka-uniporme ug hubog pa sa dihang nahitabo ang insedente.
Matud ni Police Chief Inspector Ariel Phillip Pontillas, Chief sa City Intelligence Unit nga miinit ang ulo sa sundalo human nga wala gipalusot sa traffic enforcer nga si Mark Sherwin Relevo.
Gibutyag usab ni Divisoria Police Station Commander Police Sr. Insp. Glen Abalde nga usa ka US Remington R4 Rifle ang gigamit nga armas sa suspek sa pagpusil sa biktima sa tuong tiil nga dali usab nga gidala sa hospital.
Sa karon detinado na sa Maharlika Detention Cell ang maong sundalo ug mag-atubang sa patung-patong nga kaso.
By: RadyoMaN Annaliza Amontos-Reyes
PC: Police Station One Divisoria
