Sunod-sunod na operasyon tagpahigayon nan PDEA sa Surigao, 2 ka suspek nadakpan
Duha ka mga suspek an nadakpan nan kadagkuan sa Phil. Drug Enforcement Agency sa dihang tagpahigayon an sunod-sunod na buybust operation sa Surigao City ug Gigaquit, Surigao del Norte.
Tagkilaya an una nadakpan na si Jeshrun Walter Vallente Del Castillo alias “Tonton”, ulitawo, wayay trabaho ug residente sa Bioborjan Settlers, Brgy. Rizal, Surigao City. Nakuha gikan sa kamot niini an mosunod; isa ka gamay na sachet sa tagtuohang shabu, laing medium-sized na sachet na may luon na shabu, buybust money ug isa ka unit sa cellphone.
An ikaduha na nadakpan nakilay-an na si Joel Patosa Baldazotes alias “Joel” , minyo, wayay trabaho ug residente sa Purok 1, Brgy. Alambique, Gigaquit, Surigao del Norte. Nakumpiskar sa kamot niini an P1,000 na nagsilbi na buybust money, isa ka wallet, 6 ka pinilo na aluminium foil strips, isa ka sachet na may luon na tagtuohang shabu bana-bana 5 ka gramo ug isa ka cellphone.
An duha ka suspek an tagtakda sang-atan nan kaso sa paglapas Section 5 ug 12 sa Article II sa Republic Act 9165 o Comprehensive Drugs Act of 2002
