General Snatos City–Gikalipay sa duha ka opisyal sa Gensan ang sunod-sunod nga operasyon sa kapulisan batok droga kung asa mao kini ang handum sa gobyerno nga mapakgang kadtong mga tawo nga wala pa mi-undang sa maong gimbuhaton nga nakahatag ug dakong epekto sa kaugmaon sa mga kabatan-onan ug sa pamilya.
Matud ni City Councilor Jonatahn Blando nga usa sa rason nganong dali lang matultulan ang mga target suspek sa kapulisan tungod dako ang network niini sa hisgutanang imbestigasyon.
Panahon nga adunay madakpan sa buy bust adunay posibilidad nga mutug-an sa kapulisan ang dinakpan ug maoy hinungdan nga dali lang matultulan ang uban pang mga suspek.
Dugang ni Blando sa hisgutanang pagpamusil sa Gensan usa usab sa hinungdan nganong dili matultulan ang mga suspek nga gapamatay diri sa syudad gumikan kay sagad sa mga motibo ang personal nga bangi.
Usa usab sa mga rason ang kawad-on ug witnesses nga mobarog bisan sila nakakita sa krimen tungod sa kahadlok sa ilang seguridad.
Samtang sa kabahin ni City Councilor Atty. Edmar Yumang nga maayo ang gihimong lakang karon sa kapulisan ang pagpahigayon ug sunod-sunod nga operasyon batok droga.
Apan alang kaniya dili lang matud pa sila motutok sa droga kundili gusto sa maong Kagawad nga mahatagan ug kasulabaran ang mga nagakahitabong patay sa syudad.
Gani gihagit niini ang kapulisan nga kung kaya nila mahatagn ug intelligence network ang droga nganong dili man pod hatagan ug intel network alang sa mga kriminal nga nagapamatay ug tawo sa syudad. (RV)
