General Santos City–Aduna na matud pay ginasundan nga mga person of interest karon ang Police Station 1 sa sunod-sunod nga nahitabong pagpangawat ug motor sa ilahang area of responsibility karong simanaha.
Sumala pa ni Police Captain Abdulsalam Mamalinta, Hepe sa Police station 1 nga basi sa ilahang nakuha nga mga CCTV footage sa mga area kung asa nahitabo ang mga pagpangawat ug motor migula nga posibleng usa lang ka grupo ang nagahimo niini kung asa sa karon aduna na silay 2 ka person of interest ang nga identify ug padayon nalang silang nagapangalap ug ebidensya aron nga mapasakaan kini ug tukmang kaso.
Samtang basi sa ilahang nahimong pagsuta ang mga kawatan matud pa ug motor ang mu-operate pinaagi sa tulo ka tao, usa matud pa ang driver usa ang lookout ug usa usab ang maoy muabri ug mopaandar sa motor nga ilahang target.
Sa kasamtangan ginasuta pa sa Police Station 1 kung usa ba ka organize nga grupo ang mga suspect.
Dugang pa ni Capt. Mamalinta nga basi sa ilahang nadawat nga impormasyon nga ang mga motor nga nakawat sa mga suspect ang ginadala matud pa sa Maguindanao ug didto ginabaligya.
Nanawagan usab si Capt. Mamalinta ngadto sa mga nanag-ya ug motorsiklo nga kung mamahimo tabangan ang kapulisan sa pagbantay sa ilahang mga gamit ug dili hatagan ug opurtunidad ang mga kawatan nga makapangawat.
Kung aduna matud pay mga motorsiklo dapat siguron nga nakalock o dili ba kaha butangan ug cadena aron dili dali-dali ug kawat. Mas maayo usab nga ibutang kini sa mga lugar nga duol sa CCTV camera aron makit-an kung kini hilabtan sa kawatan, mas maayo usab kung butangan ug device nga mo-alarm higayon nga kini hilabtan sa kawatan.
Nasayran nga gikaalarma na sa kapulisan ang sunod-sunod nga kaso sa pagpangawat ug motorsiklo hilabi na sa area of responsibility sa Police Station 1. (Dave Silagan)
