Gibana-banang mikabat sa 30 mil pesos ang damyos sa sunog niadtong Sabado sa hapon sa Zone-7, Sta. Cruz, Tagoloan, Misamis Oriental.
Gipahayag sa Misamis Oriental Fire Station nga duha ka balay ang naugdaw sa maong sunog samtang laing usa ang partially damaged.
Atol sa insidente, nakuryentihan usab ang dose anyos nga batang lalaki kinsa gituhoang nakatunob sa linya sa kuryente nga wala maputol hinungdang kalit kining mikirig.
Tungod niini, daling gidala sa hospital ang maong menor de edad kinsa padayon karong nagpaayo sa hospital.
Matud pa nga duha ka anggulo ang gitan-aw karon sa mga ginsakpan sa Misamis Oriental Fire Station ug kini mao ang nabiyaang nilung-ag ug electrical faulty wiring.
Hinuon, anaa lamang sa unang alarma ang maong sunog human nga nadali kini pagpalong sa mga nagtinabangay nga silingan.
