BACOLOD CITY – Nagdangat sa kapin Pe75 mil pesos ang kahalitan nga gintuga sang pagkasunog sang isa ka balay sa Brgy. Estefania, Bacolod City kahapon sang hapon.
Ang amo nga balay ang ginapanag-iyahan ni Eugenio Anib, 58 anyos ang edad sang Purok Villamar, Brgy. Estefania.
Base sa initial investigation sang Bacolod Bureau of Fire Protection, may mga las 4:45 kahapon san hapon sang natuhaw ang sunog kon diin ginaalegar ini ang naghalin sa 2nd floor sang amo nga puluy-an partikular sa kwarto sang iya bata.
Matapos ang 15 minutos, napalong ang kalayo bangud man sang madasig nga pagresponde sang mga bombero.
Suno pa sa BFP, faulty electrical wiring ang gintunaan sang sunog kon diin wala sang may nahalitan ukon nasamaran sa bahin sang mga naga-istar diri./dyHB BACOLOD
