Nagkaabusan na sang supply sang faceshield sa pipila ka mga establishemento dire sa syudad sang Koronadal umpisa sang nagpaggwa sang kamanduan ang Department of Transportation ukon DOTr sa mandatory nga pagsusksok sang faceshield sang mga pasahero sang mga public utility vehicles nga mag-epektibo naman sa Agosto 15.
Suno kay DTI-South Cotabato industry development specialist Ria Hallarsis ini ang base sa ila monitoring sa 32 ka mga establishemento dire sa syudad , apang may-yara naman suno pa sang manug-abot nga supply subong nga bulan.
Nagadalagan naman suno pa sa P45.00- P100.00 ang presyo sang ginabaligya nga faceshield sang mga establishemento kag bisan sa online nga nakadepende man suno pa sa kalidad.
Paklaro man ni Hallarsis nga ang papel sang DTI ang pagmonitor sa supply kag presyo sang faceshield, apang ang pagtalana sa suggested retail price ang yara na sa Department of Health.
Apela naman sang pamunuan sang DTI sa mga manufacturers sang faceshield nga ibaligya ang produkto sa rasonable nga presyo kag sa publiko naman likawan ang panic buying.
