Supply sang kuryenti kag kapasidad sang mga ginikanan sa pagpaficilitate sa mga kabataan sa pipila eskwelahan sa banwa sang Lake Sebu kag T`boli, nakit-an nga problema sang Division of South Cotabato.

Mabudlay nga itugyan lang sa mga ginikanan partikular na sa mga malagyo nga lugar sa banwa sang T`boli kag Lake Sebu ang pag-asister sa ila mga kabataan sa ipatuman nga modular learning sa kinder, grade 1, 2 kag 3 kag wala pa sang supply sang kuryenti sa lugar.

Suno kay Division of South Cotabato Schools Supt. Ruth Estacio ini ang nakit-an nila nga problema sa ginpatigayon nga assessment sa nasambit nga mga lugar.

May-angot sini, suno sa iya kinahanglan anay nila nga tudluan ang mga ginikanan sa nasambit nga mga lugar kon paano maggamit sang mga modules bag-o pa man ang pagbukas sang klase sa Agusto 24 subong nga tuig.

Ginpahayag man ni Estacio nga may-yara naman sila sang proposal sa mga local officials dire sa probinsya angot sa paghatag sang solar panel sa mga lugar sang T`boli kag Lake Sebu nga wala pa sang supply sang kuryenti.