Padayon karong giila sa kapolisan ang mga suspek nga mipusil patay niadtong Sabado sa hapon nilang Wilmer Apostol nga taga-Valencia City, Bukidnon ug Brian Campongan, 20 anyos nga taga Kalilangan, Bukidnon.
Matud ni Police Captain Jason Sto. Domingo, ang Hepe sa Police Station 7 Bulua nga gipamusil sa riding in tandem sa Barangay Canitoan ning syudad ang mga biktima.
Dugang pa ni Captain Domingo, nga gikan sa bulangan ang mga biktima sakay sa KIA Bongo apan gisundan kini sa duha ka suspek, nga sakay sa usa ka Honda xrm nga motor kolor itom nga walay plate number.
Sa imbestigasyon sa kapolisan, nga pag-abot sa Marlags sa barangay Canitoan nagpasalba ang mga suspek hinungdang mihunong ang mga biktima, apan giduolan kini sa mga suspek dayong pusil kang Campongan ayha kang Apostol.
Naangkon ni Campongan ang samad pinusilan sa ulo ug dughan samtang gipusil usab si Apostol sa makadaghang higayon sa dughan.
Human niini, gilayong gikuha sa mga suspek ang duha ka sling bag nga dala sa mga biktima ug gilayong misibat sa wala masayring direksyon.
Sa karon, gidala na ang patayng lawas sa mga biktima sa ilang gipuy-an sa Bukidnon.
