By: Joanna Ricote
Gi-presentar kagahapong adlawa sa kapulisan ang suspect sa pagpusil patay sa usa ka traffic enforcer nga si Cris Nacalaban Cabingas kang Mayor Oscar Moreno.
Matud ni Police Sr. Insp. Joel Salo, ang deputy Station Commander sa Police Station 2 Cogon, nga bandang alas 12:05 ang takna sa udto kagahapong adlawa, dihang ilang namatikdan sa Capt. Vicente Roa St corner Yacapin St. ang maong suspect, hinungdan nga ilang gi serve ang warrant of arrest nga ilang gihuptan batok sa maong responsable.
Ang maong dinakpan naila sa ngalan nga si Mohaimen Macauyag y Mama aka Alex Masacal y Tiro aka Alex Macatana ug aka Dugar, 30 anyos nga kasamtangang nagpuyo sa NHA Brgy. Kauswagan.
Si alyas Alex, maoy gitumbok nga suspect sa pagpusil patay sa traffic enforcer nga si Cris Cabingas, niadtong December 30, 2016.
Basi sa intelligence report sa kapulisan nga adunay laing target si alyas Alex, nga usa ka RTA Enforcer or Police Officer.
Nasayran nga dihang nagmalamposon kini sa pagpusil patay sa RTA enforcer nga si Cris Cabingas, dayon kini nga nagtago sa Valencia City, Bukidnon ug Marawi City, Lanao del Sur, apan nakabalik kini sa syudad sa CDO gumikan sa natigayong kagubot sa Marawi City.
Basi sa pakisusi sa kapulisan nga adunay laing warrant of arrest nga gi atubang ang maong suspect, gumikan sa kasong murder with complexed unintentional abortion, human niini gipatay ang iyang kapuyo nga si Isa Sorogaor, nga taga Brgy. Puerto niadtong October 2015.
Alayon niini, mapasalamaton si Mayor Oscar Moreno, human nga nasikop sa kapulisan ang maong suspect, samtang nanghinato si Atty. Egay Uy, ang head sa Task Force Hapsay Dalan nga mapahamtangan sa insaktong silot ang maong akusado.
Samtang, emosyonal ang inahan ni cris, nga si eulanda nacalaban cabingas, human nga sa 10 ka bulan, nasikop na ang maong suspect ug dako ang iyang pasalamat kang Mayor Moreno sa gihatag nga tabang sa iyang pamilya aron ma-angkon ang hustisya.
