Nadakpan sa Joint Police Operation sa kapolisan ning syudad ang usa ka suspect sa sunod-sunod nga kasong pagpanulis sa LBC Branches dinhi sa Cagayan de Oro ug Butuan City.
Si Police Captain Mario Mantala, nga hepe sa Crime Against Person and Property Desk kon CAPPD sa Cagayan de Oro City Police Office kon COCPO, mipa-ila sa maong suspect nga si Roosebelt Bedro alyas Bedro Salvador Rosebelt, 38 anyos, ulitawo nga taga Zone 1, Sitio Buara, Barangay Bayabas ning syudad.
Matud ni Mantala nga ilang nadakpan ang maong suspect pinaagi sa ilang Joint police operation uban sa mga elemento sa City Intelligence Unit sa COCPO mga alas dos kagahapon sa hapon sa iyang hide out sa Sitio Buara, Barangay Bayabas.
Gibutyag ni Mantala nga ilang gidakop ang maong suspect pinasikad sa Warrant of arrest nga gi-issue ni Judge Emmanuel Escatron nga Presiding Judge sa Regional Trial Court Branch 2, sa Libertad, Butuan City.
Matud ni Mantala nga ang maong suspect nag-atubang sa kasong Robbery with violence and Intimidation sa sala ni Judge Escatron ubos Criminal Case number 2019-086.
Gibutyag ni Mantala nga si Berdo, gitugotan ni Judge Escatron nga magpiyansa sa kantidad nga 100 thousand pesos alang sa iyang temporaryong kagawasan.
Ang maong suspect gi-detain sa Custodial Facilities sa COCPO ug gitakda nga dad-on kinig balik sa Butuan City aron ipa-atubang sa SALA ni Judge Escatron.
