Dead on arrival ang suspek sa pagpangluthang sa police mobile nga ginkapilas sang isa ka PNP personnel sang Polomolok MPS matapos suno pa nga nangagaw sang pusil sang isa ka polis, samtang ginabyahe ini pakadto sa Polomolok MPS kahapon sang kaagahon sa National Highway, Purok Masagana, Barangay Magsaysay, Polomolok, South Cotabato.
Ginkilala ang napatay nga suspek kay alias Totong Alisin legal ang pang-edaron, residente sang Purok Norcos, Barangay Poblacion sa nasambit nga banwa.
Base sa imbestigasyon sang Polomolok MPS, bag-o nagluntad ang insidente, nakabaton sila sang tawag halin sa isa ka concerned citizen nga may isa ka lalaki ang nasiplatan nga may dala nga armas sa Purok 5, Barangay Palkan sa nasambit nga banwa.
Gilayon naman nga gin-usisa ang nasambit nga impormasyon sa diin ginpadulungan ang area kag naispatan ang lalaki nga may dala sang armas.
Sang ginsita ang suspek hinali na lang nga ginpalukpan ang kapulisan nga nag-igo naman sa patrol car.
Bumalos ang operatiba, apang tigayon naman nga nakapalagyo ang suspek sakay sa iya motorsiklo.
Wala na nakalagas ang operatiba bangud naigo ang karito sang dala sini nga patrol car.
Samtang pilason naman si PCpl Albert Taculod matapos maigo ini sa iya likod bangud sa pagpangluthang sang suspek kag madasig naman nga gindala sa ospital para madapatan gilayon sang nagakaigo nga medikasyon.
Sa pagpangusisa pa sang kapulisan, ginkilala ang suspek kay Alias Totong Alisin nga yara sa impluwensya sang makahulubog nga ilimnon kag pipila ka bes nga nagpalupok sa nasambit nga lugar.
Narekober naman sa gintabuan sang insidente ang improvised 12-gauge shotgun may magazine nga may unod sang duha ka bala kag duha ka basyo.
Bangud sa insidente, nagpatigayon sang joint operation ang Polomolok MPS, SCPMFC kag RPDEU sa lugar sang suspek sa diin naaresto ini sa sulod sang iya balay.
Narekober sa iya possession ang isa ka orange/black sling bag nga may unod sang duha ka bala sang 12 gauge shot gun, pito ka bala sang cal. 38, duha ka basiyo sang cal. 38 kag katorse ka bala sang cal. 5.56.
Ginpusasan kag gindala sang kapulisan pakadto sa Polomolok MPS para sa booking procedure apang samtang nagabyahe ginaaligar nga nangagaw ang suspek rason nga ini ang gintiro kag napatay.
Suno sa Polomolok PNP anay na nga napreso ang suspek sa GenSan City Jail sa kaso sang druga kag yara sa drug watclist.
Miyembro man suno pa ang suspek sang AKP Nilong group kag kaupod sa robbery hold-up, carnapping kag gun for hire.
