General Santos City–Karong adlawa gikatakdang kasuhan sa WCPD sa Police Station 6 ug kasong rape ang suspetsadong si Aljun Gonora, 22 Anyos, nga taga Rajah Muda, Barangay Bula, Gensan kansa gitudlong suspek sa pagpanglugos sa usa ka minor de edad nga itago lang sa pangalang Alias Hazel, 17 anyos nga taga Barangay West, Gensan.
Una nang nasikop ang suspetsado human nga gitudlo kini sa biktimang minor de edad nga maoy nanglugos kaniya sulod mismo sa balay sa nahisgutan niadtong Byernes sa gabie human kining nakig-inum sa nahisgutan ug sa mga amigo niini.
Hugtanon man usab nga gipanghimakak sa suspect nga si Aljun Gonora nga gihilabtan niya ang biktima nga minor de edad samtang anaa kini sa ilang panimalay.
Sumala pa niini nga nauna na siya ug tulog gumikan sa tumang kahubog. Ang biktima matud pa nakigdulog ngadto sa iyang amigo ug wala na siya nasayod unsay nahitabo.
Natingala nalang kini dihang siya maoy gitudlong nanghilabot sa biktima nga wala man gyud niya kini gihimo. Gihingusgan pa sa suspect nga gidamay lang matud pa siya sa biktima bisan nga dili siya maoy responsabli niini. (Dave Silagan)
