General Santos City— Padayon pa ang gihimong pag-ila sa Polomolok Municipal Police Station sa mga suspek nga miilog sa motorsiklo ug mipusil sa biktimang si Ryan Codiale, 24 anyos, ulitawo, construction worker ug residente sa barangay palkan, Polomolok, South Cotabato.
Gibutyag ni Jonel mangayao, 23 anyos, ig-agaw sa biktima nga igo lang mipalit ug sud-an si Ryan sakay sa iyang xrm 125 nga motorsiklo kolor pula, uban ang duha ka minor de edad duol sa Dolores Resort.
Pauli na unta ang mga nasangpit dihang sila giatngan sa mga suspek dayon gibabagan ang ilang dalan ug pugsanong gikuha ang ilang motorsiklo.
Nisuway ug sukol ang biktima mao nga siya gipusil sa suspek igo sa iyang baba gamit ang kalibre 38 nga pusil. Gilayon nga nakasibat ang mga suspek sa wala sayring lugar samtang ang biktima gidala sa South Cotabato Provincial Hospital.
Dugang pa ni Jonel nga wala namay-ungan sa mga biktima ang mga suspek ngaresponsabli sa krimen tungod sa kapaspas sa panghitabo.
