General Santos City–Nagpadayon ang gihimong imbestigasyon sa Polomolok PNP sa pagpanulis patay sa usa ka market vendor sa may Purok Pagkakaisa Barangay Lumakil Polomolok, South Cotabato nga si Samson Baladic nga residente sa maong lugar.
Sa inisyal nga imbistigasyon sa Polomolok PNP nasuta nga pauli na ang biktima sa ilang panimalay uban sa iyang asawa sakay sa ilang multicab dihang pag abot sa lugar, sila giharang sa upat ka mga supetsadong nakamotorsiklo dayon mideklara ug tulis.
Gipusil dayon sa mga suspek ang biktima gamit ang kalibre 45 nga pistola igo sa iyang lawas nga bahin. Gikuha usab nila ang kwarta sa biktima nga nagkantidad ug P10,000.00 pesos dayon sibat sa wala masayring lugar.
Swerte usab nga wala gihilabtan sa mga suspek ang asawa sa biktima nga si Mary Jane Baladic.
Subay sa pamahayag niini sa kapulisan nga ang mga suspek pulos nakataptap ang nawong ug nakasubob ug kalo mao nga wala niya namay-ungan ang mga nawong sa mga nahisgutan. Sa karon blangko pa ang Polomolok PNP sa ilhanan sa mga suspetsado.
