General Santos City— Giangkon man usab sa suspek nga si Christopher Mariposque nga iyahang gidala ang biktima hangtud na dinhi sa dakbayan sa Gensan kung asa siya maoy migiya sa ilahang dalan nga agian.
Gani iyaha matud pang gisultian ang biktima sa iyahang mga problema hilabina sa problema niini sa kwarta nga 50mil ka pesos. Wala matud pa siya’y intensyon nga pasakitan ang biktima ug buot pa niya kining ubanan pauli hangtud Digos aron nga masigurong walay dautang mahitabo sa biktima.
Dugang pamahayag sa suspek nga human mahatag ang 20mil ka pesos kaniya, wala na misugot ang biktima nga muuban kaniya pauli sukwahe sa ilahang sinabutan.
Pag-angkon sa suspek nga nawala ang iyahang kwarta human maka-table ang usa ka babaye sulod sa usa ka imnanan gumikan sa tumang kahubog. Apan gibutyag niini nga ang iyahang mga kaubanan nga nag-inom maoy nakamatikod sa hulgaway sa babayeng iyahang nakauban nga posibleng responsable sa pagkuha sa iyahang kwarta.
