General Santos City–Patay sa operasyon sa kapulisan ug kasundalohan sa Sarangani Province ang usa sa mga suspek sa pagpamomba gawas sa lying-in center sa barangay Apopong sa nakalabay nga bulan.
Sumala ni Police Supt. Aldren Gonzales- spokesman sa pro 12 alas 4:00 sa kaadlawon gilusad sa tropa ang operasyon batok sa mag-amahang Basir Sahak ug Kupang Sahak.
Narekober sa otoridad ang mga usa ka IED, pusil ug mga IED component human ang operasyon.
Gikaingong misukol ang suspetsadong si Basir ug namatay sa engkwentro samtang nakasibat ang amahan niining si Kupang.
Si Basir ang usa sa 19 ka mga suspek sa Gensan bombing niadtong setyembre 16 karong tuiga ug gikaingong finance officer sa grupong Ansar Al Khilafa Philippines nga dunay koneksyon sa mga international terrorist, samtang suspek usab kini sa pagpatay sa kanhing kapitans a barangay Lapu Polomolok nga si Omala Nilong . (Jordan Britos)
