General Santos City—Nagpablin pa sa balay tambalanan karon ang usa ka Pederito De Claro Rojas II, 42 anyos, sikad driver ug nanimuyo sa KPS, Olater Compound, Barangay Labangal Gensan human nga g pusil sa wala mailhing suspect alas 2:00 ang takna sa kaadlawon sa Digos Makar Road Cor. Fernandez Street, Barangay Lagao.
Sumala pa ni Police Major Ruelito Lumiguid ang hepe sa Police Station 3 nga nagalingkod lang matud pa sa maong higayon ang biktma sa waiting shed nga anaa sa maong lugar sa dihang kalit giduolan sa wala mailhing suspect ug gipusil usa ka higayon.
Naka-angkon ug samad pinusilan ang biktima sa iyanag lawas nga milapos usab sa iyahang likod gamit ang kalibre 45 nga armas, kansa gidala dayon sa pinakaduol nga hospital.
Personal grudge ang ginasundan nga motibo karon sa Police Station 3 sa pagpamusil sa biktima.
Dugang pa ni Major Lumiguid nga lahi matud pa ang sitwasyion sa nahitabong pag pamusil sa nasampit tungod kay kaisa lang kini gipusil ug wala giantimano hayan posible matud pa nga gibalusan o gipatagam lang.
Sa karon paaboton pa sa Police Station 3 nga makahatag sa iyahang pamahayag ang nahisgutang biktima human kining ma-operahan ug ilahang sutaon kung kaila ba sa nahisgutan ang suspect nga mipusil kaniya.
Sa kasamtangan ginasuta pa sa kapulisan ang back ground sa biktima ug ilang sayron kung aduna ba kini kanhing record sa uban pang estasyon sa kapulisan ug kung kinsa ang mga nakalaban niini ayha nahitabo ang pagpamusil.
Nasayran nga nag dumili pa sa paghatag ug pamahayag ug impormasyon ang mga kabanay sa biktima, apan takda nila kining balikan sa pamasin nga maghatag na ug pahayag ang mga nasampit bahin sa nahitabo kang Rojas.(Dave Silagan)
