General Santos City–Malampusong nadakpan sa tropa sa Police Station 2 ang suspek sa pagpatay sa biktimang si Rogie Zamora, 26 anyos nga taga Purok 11, Barangay Lagao, Gensan , kansa una nang nakaplagang patay alas 4:00 pasado ang takna sa kabuntagon kagahapong adlawa.
Matud ni Police Major Ananiaz Vasquez, Hepe sa Police Station 2, nasikop ang suspek sa pagpatay nga si Avelardo Evangelista, 19 anyos nga taga Purok Olarte, Barangay Labangal, Gensan atol sa gihimong hot pursuit operation sa iyang mga sakop.
Nasikop kini sa panimalay sa iyang Step Father didto mismo sa maong purok. Gikaingong bingkil sa inum ang hinungdan sa pagpatay sa suspek ngadto sa biktima. Samtang apil usab nga gidakop ang ama-ama sa suspek human iyang gitabangan matud pa nga makasibat ang nasangpit.
Giangkon usab ni Avelardo Evangelista nga iyang gipatay ang biktimang si Rogie Zamora. Sumala niini nga bag-uhay lang silang nagkaila sa biktima sa may Pioneer Avenue. Iya kining gihagad ug inum sa ilang balay sa Purok Olarte apan dihang nangahubog na sila siya gisultian ug adik sa biktima mao nga siya nasuko nga misangko sa pagpanigbas patay niini ngadto sa nasangpit.
Dugang pahayag sa suspek nga wala siya nag inusara sa pagpatay kang Zamora.Kaabag matud pa niya ang iyang amigo nga ginganlang si Piolo. Ayha ang pagpanigbas nagsinumbagay pa sila sa biktima hangtud nga iyang gigukod ug sundang ug gitigbas nga hinungdan sa iyang kamatayon.
Samtang gihingusgan usab sa suspek nga walay kalambigitan sa krimen ang iyang step father kansa apil gidakop sa kapulisan. Segun niini nga igo ra siyang giilisan sa iyang ama-ama dihang nakit-an nga nagkadugo ang iyang sinina.
Hustisya usab ang singgit sa inahan sa biktimang si Rogie Zamora human sa kamatayon sa iyang anak.
Sumala sa ginang nga unta unsa may problema sa iyang anak gipapreso nalang inay tigbason ug yano lang nga patyon.
Nasayran nga nakurat nalang ang ginang human nasayran ang kamatayon sa iyang anak, ug natingala usab kini nganong nakaabot sa Barangay Labangal ang iyang anak nga wala man unta kini kaila sa maong lugar.
