Nasikop sa kapulisan sa Cagayan de Oro ang suspek sa sunod-sunod nga pagpanulis dinhi sa syudad.
Kini ang gipahibalo ni Police Supt. Nelson Aganon, Acting Director sa Cagayan de Oro City Police Office o COCPO.
Matud ni Aganon nga ang suspek nasikop sa kapulisan sa Cogon sa dihang mireport kanila ang biktima mga alas 11:30 sa gabie niadtong Huwebes.
Sa dihang mihimo sa follow up operation ang kapulisan, gilakag nila ang duha ka suspek apan usa lamang ang nasikop human ma corner ug nakulatahan sa mga tambay sa Limketkai Drive ning syudad.
Samtang, gibutyag ni PO1 Genesis Babanto sa Cogon Police Station nga ang suspek mao si Vincent Salvalion, 22 anyos, ulitawo nga taga Alcohomes, Barangay Carmen ning syudad.
Nakuha gikan sa suspek ang 9 inches nga kutsilyo, sling bag, celfon, pitaka ug company ID nga gipanag-iyahan sa complainant nga si James Albert Mira, 22 anyos, ulitawo ug taga Upper Macasandig.
Gidugang ni PO1 Babanto nga gawas kang Mira, biktima usab sa maong suspek ang 17 anyos nga estudyante nga taga Old Road, Barangay Gusa, John Lagit, 25 anyos, ulitawo, taga Purok 3-A, Barangay Gusa ug Jerson Salvaleon, 21 anyos, ulitawo nga taga Upper Carmen ning dakbayan.
Alayon niini, naghangyo ang COCPO sa tanan nga ipa blotter ang bisan unsang krimen aron daling makahimo og aksyon ang kapulisan.
Kini human nasayran nga dunay unang nabiktima sa pagpanulis sa maong suspek nga wala mireport sa kapulisan.
Naghangyo usab ang kapulisan nga pwedeng mohatag sa impormasyon sa COCPO hotline number 0936-401-7888 or sa FB: cocpo-pcru.
