BACOLOD CITY – Mga armas kag granada narecover sa nadakpan nga duha ka mga lalaki nga gina suspetsuhan miembro sang isa ka robbery hold-up group kagab-i sa Brgy. Sum-ag, ciudad sang Bacolod.
Ang mga suspek ginkilala nga sanday Romy Hituro, 34 anyos, residente sang Zone 12, Brgy. Handumanan, Bacolod City kag si Arnold Epogon, 21 anyos, pumuluyo sang Brgy. E. Lopez, Silay City.
Nadakpan ang mga suspek pasado las 8 kagab-i sa Sitio Badiang, Brgy. Sum-ag, Bacolod City kon diin ini sila ang alleged miembro sang Epogon Robbery Group nga amo ang responsible sa pila ka serye sang robbery/hold-up nga nagakatabo sa Southern Negros.
Kalakip sa na-recover sa mga suspek ang isa ka M16 armalite rifle, 3 ka 9mm, isa ka granada subong man mga live ammunitions nga nakasulod sa sako.
Hugot nga ginapanginwala sang mga suspek ang ila involvement sa serye sang robbery hold-up kon diin ginsiling ni Hituro nga ang iya lang sabton amo ang kaso nga igapasaka batuk sa iya angut sa mga armas nga nakuha sa iya.
Suno sa suspek nga si Romy, wala sila nakahibalo nga armas gali ang unod sang saku nga ila ginkuha kag wala man sila nakahibalo kon sin-o ang naghatag sini kag kon diin idul-ong.
Apang sang ulihi, nakatabinas ang iya baba kag nagsiling nga armalite lang ang iya bitbit kag indi naman iya ang granada.
Sa karon ang 2 ka mga suspek detained na sa custodial facility sang Police Station 9./
