Kampante si Provincial Budget Officer Jose Percival Salado nga indi mag madinalag-on ang administrative charges nga gross neglect of duty batok sa iya matapos nga ini ang gindagdagan sang 60-day preventive suspension ni Governor Eugenio Jose Lacson.
Madumduman nga antis pa man naguwa ang suspension order kay Salado sang Hunyo 8, ginapapanaugan na ini sang show cause order sang Marso bangud sang mga review sang Department of Budget and Management (DBM) nga nagalapaw na sa 45% ang ceiling sang Personal Services sang probinsiya.
Sa exclusive interview sang DYHB kay Salado, ginpahayag sini nga ang mga audit sang DBM ang naka-address sa Sangguniang Panlalawigan kag gina-copy furnish lang ang iya opisina. Ginpanindugan man sini nga gina-remind niya sa masami ang gobernador nga nagalapaw na ang probinsiya sa ceiling sang dapat nga swelduhan sini nga empleyado.
Samtang, ginsabat man ni Salado ang mga alegasyon nga may gintago siya nga mga dokumento may angut sa mga review sang DBM. Ginpahayag ni Salado, nga amo nga mga review nga ginapadala kada tuig ang naka-address sa provincial board, kag ginahatagan lang sang kopya ang iya opisina.
Subong nga adlaw, makighinun-anon na si Salado sa iya abogado may angut sa iya posible nga tikang kasunod sang suspension order, apang iya man ginpahayag nga handa siya nga magsunod sa proseso sang provincial government.
[image: image.png]
