Epektibo kasuodma, acting Mayor na kan banwaan nin San Fernando, Camarines Sur si Bise Alkalde Aris Ragay. Ini mantang yaon sa tulong bulan may sarong aldaw na suspension si Mayor Fermin Mabulo basado sa desisyon kan oficina kan Ombudsman.
Matatandaan na ipig-post kasuodma ni Mabulo sa saiyang facebook account na siya under suspension ninhuli sa kasong simple misconduct catacod kan sa iyang pagserbi bilang pamayo kan Sagip Kalikasan Task Force kan provincia nin Camarines Sur. Sinabi pa ni Mabulo na siya pigmamanduhan ni Governor Villafuerte na mag-aprehendir kan illegal loggers, illegal miners, illegal quarry operators asin iba pang mga perpetrators nin soboot illegal na mga aktibidades na nagresulta sa pagplantar nin mga kaso laban sa saiya. Sa kadakul-dakol na mga kasong inatubang niya, sarong kaso na pigplantar kan bistadong personalidad sana nanggad an nagtriumfo na naging basehan kan saiyang suspension. Dae niya pigngaranan kun siisay an sinasabing bistadong personalidad.
Mientras tanto, sinabin ni Mabulo na siya asin an saiyang mga abogado naguibo man kan gabos na legal remedies ta nganing convinciron ang Ombudsman na an tulong bulan sarong aldaw na suspension sa saiya delikadong maray sa mandatong pigtao kan mga taga San Fernando, Camarines Sur.
Si Mabulo iyo man an presidente kan League of Mayors sa Camarines Sur.
An suspension order mismong pig-serve kasuodma nin hapon ni DILG CamSur Provincial Director Melody Relucio na nagconfirmar na ang complainant catacod kan suspension order ni Mabulo iyo an negosyante asin kontratistang si Wilfredo “Bimbo” De Leon, Jr.
