General Santos City–Aminado si Atty. Arnel Zapatos, City Administrator ning dakbayan nga usa sa mga hinungdan nga nadugayan ang pagpa-uli sa mga LSI sa syudad mao ang gipagawas nga memorandum sa DOH nga dili na pwedeng magpadala ug specimen sa Pinggoy hospital ug Cotabato regional and medical center para sa swab testing.
Apan napangitaan na matud pa kini ug pamaagi kung asa ang 41 nga mga LSI nga naunang natanggong, naka-uli na apan usa niini nabilin human nga nagpositibo sa virus ug anaa na sa covid facility sa dakbayan.
Tungod matud pa nga kulang ang supply sa cartridge para sa Rt-Pcr Test, na-aprubahan sa local IATF nga magpalit ang LGU Gensan ug 7mil ka rapid test kits para sa tulo ka bulan.
Dugang pamahayag ni Atty. Zapatos nga sa karon nagmando na si Gensan City Mayor Ronnel Rivera nga mangita ug laing partner pinaagi sa mga private laboratories sa kasikbit nga rehiyon nga nagapahigayon ug RT-PCR TEST.
Kini aron nga kung magpadayon ang kakulang sa ihap sa mga cartridges nga adunay padulngan ang syudad aron nga masuta kung positbo o negatibo sa covid 19 ang mga residente niini hilabina nga padayon ang pagsulod sa mga LSI ug ROF sa syudad.
Nauna na matud pang giklaro ni Mayor Rivera nga dili sayop sa DOH ang pagkulang sa mga cartridges ug kini matud pa ang kinahanglang sabton rason nga sila sa lokal nga panggamganan ang nangita usab ug pamaagi aron nga ma-address ang problema.
Samtang gibutyag ni Atty. Zapatos nga adunay 90 ka mga cartridges ang niabot sa St. Elizabeth Hospital para sa covid 19 testing apan tungaon matud pa kini sa Gensan ug Sarangani.
Nasayran nga sa dakbayan sa Gensan, adunay 92 ka mga LSI ang gikatakdang ipa-ilalom sa swab testing ingon man may mga LSI usab gikan sa Sarangani ang kinahanglang i-swab test.
Tungod matud pa sa limitadong ihap sa mga cartridge, nadesisyunan ni Dr. Lobert Padua, ang nag-inusarang infectious disease expert sa rehiyon nga unahon ang 27 ka mga LSI subay na usab sa gihimong screening sa mga Doktor.(LVR)
