Pormal na nga gibuksan ang Swimming Pool Complex sa lungsod sa Naawan Misamis Oriental. Kini taliwala pa man nga dili pa syento porsyento nga nahuman ang maong pasilidad apan gi-ingong mahuman kini sa upat hangtud lima ka bulan gikan karon.
Tungod ni-ini, pwedi na nga mo-host ang lalawigan sa Misamis Oriental og Palarong Pambansa. Mao kini ang gibutyag ni Governor Bambi Emano sanglit olympic size ang maong swimming pool.
Gipasalamatan ni Emano ang pamunoan sa Local School Board sa probinsya, LGU Naawan ug ang uban pang mga indibidwal nga naka-contribute sa kalampusan sa pagpatukod sa maong swimming pool.
Dugang pa ni-ini nga dako ang matabang sa maong pasilidad ngadto sa mga kabataang atleta sa natad sa swimming sanglit naa na silay mapraktisan ug mapahigayonan sa swimming competition.
Ang maong aktibidades ang gitambongan sa mga kadagkoan sa Misamis Oriental ug lakip nga mitambong ang kanhi olympian ug SEA Games gold medalists Eric Buhain kung diin usa kini sa mga miapil sa ribbon cutting.
Human sa maong seremonyas gisugdan na gilayon ang 2022 Misamis Oriental Sports League Swimming Event kung diin gisalmotan kini sa mga swimmer gikan sa mga nagkalain-laing lugar sa Misamis Oriental.
Kasama mo sa Balita, RadyoMaN Andy Coco, DXCC Tatak RMN!
