ILOILO CITY – Nagpahayag sang pagkaalarma si Acting City Mayor Jose Espinosa III sa mataas nga insidente sang krimen nga nagaulamid sang mga minors.
Bangud sini ipatawag sa isa ka sinapol ni Espinosa ang tanan nga mga natungdan nga ahensya sang gobyerno kag opisina sang syudad agud hambalan ang problema kag masabat ang mga isyu nga ginkaulamiran sang mga minors kaangay sang rambol kag paglapas sang curfew ordinance.
Sapulon ni Espinosa ang Task Force on Moral and Values Formation, City Social Welfare and Development office (CSWDO), liga president councilor Reyland Hervias, Iloilo City Police Office (ICPO) kag City Councilor Liezl Joy Zulueta Salazar bilang chairman sang oversight committee on Women, Children and Family.
Matandaan nga sa hugot nga implementasyon sang Iloilo City Police Office sang curfew for minor ordinance nakadakop ang kapulisan sang 71 ka violators sang ordinasa.
Luyag sang acting mayor nga mahibaluan kun sin-o ang nagkulang sa ila katungdanan.
