LAIN na sab nga taas nga opisyal sa komunistang grupo misurender ngadto sa militar niadtong Pebrero 1 sa Sta Cruz, Davao del Sur.
Ang mitahan giila nga si Alvie Marie Salvaleon Cominador kinsa nailhan sab nga alyas Ara, Secretary of Guerrilla Front (GF) 51 sa Southern Mindanao Regional Command (SMRC).
Siya misurender uban sa iyang staff officer sa Sub-Regional Command (SRC) 3 nga nailhang si Shane Rosete Cacdac isip alyas Neo. Sila miampo ngadto sa hiniusang elemento sa 39th Infantry Battalion ug 73th IB, Philippine Army sa Sta. Cruz sa probinsiya niadtong Huwebes.
Sa inisyal nga paghinabi sa tropa ngadto kang Cominador, iyang gibutyag nga mihangop siya sa edolohiya sa komunista sukad niadtong 1999 sa dihang misalmot siya sa Kabataang Makabayan.
Human ang tulo ka tuig sa organisasyon, nahimo siyang hingpit nga miyembro sa New People’s Army (NPA) ug napromotar sa sa “hierarchy” ug nahimong front secretary sa GF 51.
Nahisakop siya sa komunistang kalihukan sulod sa 16 ka tuig. Sumala kaniya, gikapoy na siya sa pagtago-tago gikan sa tropa sa kagamhanan kinsa naglusad og way puas nga giyera batok sa NPA.
Napresyur sila niining way puas nga opensiba sa militar sa kabukiran ug sa samang higayon, gimingaw na siya sa iyang mga anak.
Kini maoy nagtukmod kaniya nga mobalik sa sabakan sa balaod aron nga magpuyo og normal ug malinawon nga kinabuhi. Kahinumdoman nga niadtong Enero 15, 2018, ang deputy secretary sa Far South Mindanao Region sa CPP/NPA, Noel Minioto Legazpi isip alyas Efren, uban sa iyang asawa nga si Jeanalyn Defensor Bendalian isip alyas Wendy, medical staff sa FSMR, misurender ngadto sa tropa sa sa 27th IB sa South Cotabato.
Sukad niadto, daghan nang ihap sa mga NPA terorista mitahan ngadto sa yunit ubos sa 1002nd brigade. Mga kanhi rebelde ipresentar ngadto sa lokal nga kagamhanan sa Davao del Sur alang sa dinaliang tabang ug pag-enrol ngadto sa Comprehensive Local Integration Program sa gobyerno alang sa rebel returnee kon diin makadawat sila og tabang pinansiyal ug livelihood assistance.
Ang nasudnong kagamhanan subling nanawagan alang sa mga rebelde nga itahan ang ilang mga armas ug mobalik sa sabakan sa balaod aron nga makapahimulos sa mga programa sa kagamhanan. (Emir Bariquit)
