Taas nga presyo sa produktong petrolyo, usa sa mga hagit sa administrasyong Marcos

Gikabutyag karon sa usa ka Political Analyst ug Lead Convenor sa Citizens Watch on Good Governance (CWGG)-Region X nga si Atty. Antonio Soriano nga usa sa mga hagit nga sagubangon sa administrasyong Marcos ang padayon nga pagsaka sa produktong petrolyo.

Sa interview sa RMN Malaybalay, gibutyag ni Atty. Soriano nga mamahimong dakong hagit karon sa administrasyon ni Presidente Ferdinand Marcos Jr. ang pagsulbad sa padayon nga pagsaka sa produktong petrolyo.

Dugang pa niya nga posibleng magmugna og “multiplier effect” ang maong problema ilabi na og nakatutok ang particular nga negosyo sa pagdeliver og mga basic commodities diin kung taas ang presyo sa petrolyo, pasakaan usab ang presyo sa mga nag-unang palaliton.

Nagtaas na matud pa ang pletehan sa Jeep diin posible usab nga musunod ang pagsaka sa pletehan sa bus, eroplano, ug uban pang pampublikong sakyanan.

Matup pa ni Soriano nga sa karon dili na kaayo makasinati og hugot nga trapik ang Cagayan De Oro City tungod kay dili na ganahan mulakaw ang mga residente tungod sa taas nga presyo sa petrolyo.

Dugang pa nga maglisud gayud ang ekonomiya sa nasud kung padayong nga musaka ang presyo sa petrolyo ilabi na og mupatong na ang matag litro sa usa ka gatos ka pesos.